أنا واللي حواليه

2011-09-17T04:51:00.003+02:00

درست في الأحياء في المرحلة الثانوية أنك اذا أغمضت عينا واحدة وفتحت الأخرى ترى الأشياء ثنائية الأبعاد واذا فتحت الاثنان ترى البعد الثالث لها.. وعلمت في خلال دراستي للطب أن هناك ما يسمى بالنقطة العمياء وهي نقطة تقع في مجال رؤيتك ولكنك لا تراها اذا كنت ترى بعين واحدة ولكن اذا فتحت الاثنان رأيتها..
كذلك أرى البشر وكذلك يرون.. أرى ان هناك نوعان من البشر نوع ثنائي الأبعاد ليس له عمق، مسطح يطفو على سطح بحر الحياة، يذهب مع الأمواج أينما ذهبت، وهؤلاء يرون العالم بعين واحدة يرونه مسطح مفرغ من المعنى وحتما هناك نقطة عمياء في رؤيتهم وغالبا هذه النقطة هي أنفسهم..فلا يروها واذا رأوها رأوها كاملة جميلة وهكذا يريدون أن يراهم الناس.. كاملين خالين من العيوب..
وهناك نوع آخرمن البشر..نوع ثلاثي الأبعاد نوع يبحث في معنى الحياة يغترف بيديه من بحرالحياة فيشرب تارة ويجد الماء ملحا فيعيده لمجرى الحياة تارة أخرى.. يبحث في وجود العالم ووجوده و يسعى وراء المغزى من حياته ويجتهد لخلقه.. هؤلاء يرون داخلهم بوضوح، قد يكون ما بداخلهم مقطعا، منقوصا، مذبذبا ولكنهم يرونه بوضوح.. يعبرون عما بداخلهم بكل انسيابية وسلاسة دون خوف من الناس، فماذا تضرهم نظرات الناس وقد اتضحت حقيقتهم أمام أنفسهم وأحبوها كما هي دون تجميل....
أمّا أنا فكثيرا ما تمنيت أن أكون ثلاثية الأبعاد....... سأكون مجنونة في أعين الناس.. فليكن! فلأكن مجنونة، مجذوبة، حمقاء ولكن سيكون عزائي أنني أرى نفسي بوضوح.. أراها معذّبة أو جميلة أو مفتتة .. أريد ان أراني كما أنا بدون مساحيق بدون كذب او خداع.. هكذا كان الفلاسفة والشعراء والعظماء والفنانين .. مجانين في أعين الناس.. كانوا مجذوبين.. منبوذين كالمجذومين..
ولكني لست شاعرة ولا فيلسوفة.. يكفيني أن أكون أنا..
فماذا يفيدني إذا أرضيت الناس وفقدتني؟!بل سأبحث عني.. سأبحث عن بعدي الثالث حتى أراني بوضوح.. سأبحث حتى أجدني وأضمني وأقبلني.. فكم اشتقت اليك يا نفسي!!
اذا كان كلامي بالنسبة اليك غير مفهوم فحاول ان تجد بعدك الثالث فأنت ثنائي الأبعاد.. واذا كنت غير مهتم بايجاد نفسك فاعتبر كلامي هرتلة صباحية

في رثاء أبي

2011-05-30T16:57:00.000+02:00

رغم انني كنت طفلة أبي المدللة ..ولكنني كثيرا ما اختلطت علي مشاعري تجاهه في السنوات الأولى من حياتي .. فلم أكن أعلم هل أحبه أم لا.. كثيرا ما سألت نفسي ذلك السؤال ولم أكن أعلم اجابته.. كنت ألومه لعصبيته الزائدة وقسوته الزائدة على أخي الكبير .. كنت أحيانا أخاصمه في صمت و كثيرا ما كنت ألومه على السنوات العصيبة التي مرت في حياة أخي..

في السنوات الأخيرة تغير أبي.. أو تغيرت أنا لا أدري..بدأت أشعر لأول مره في حياتي بحبه العميق لي وأحسست بأني أحبه من كل قلبي.. كنت أقول لإحدى صديقاتي عندما تتململ من عدم زواجها كنت أقول لها أننا مهما بحثنا فلن نجد مثل بيوت آباءنا.. لن تجدي من يحبك بلا قيود ويدللك ويثق فيكي ثقة عمياء.. في هذه الفترة من حياتي بدأت أحس بأن أبي صار جزءا كبيرا من حياتي.. كنا نتجادل على الغداء حول جدوى الثورة ويعلو صوتنا حتى تشكو أمي مننا ولكننا بمجرد أن نغادر الطاولة نذهب لنشاهد التليفزيون سويا وكأننا لم نكن نتجادل منذ قلبل..كنت أحبه وأعلم أنه يحبني ولكننا لم نكن نعبر عن ذلك بالكلام .. كنت أرى ذلك في عينيه.. كنت أرى حبه لي وفرحته بأن ابنته أصبحت "دكتورة" .. كنت أرى ذلك في عينيه كنت أشعر به .. لم أقل له أبدا أنني أحبه ولكني أظن أنه كان يشعر بحبي له أظنه كان يرى حبي له في عيني.. فأنا مثله لا أعبر عن احاسيسي بالكلمات ..

مات أبي.

مات أبي دون أن أقول له كم أحبه.. مات فجأة وبدون سابق انذار.. لم أكن أتخيل أن بعض الكلمات المجازية التي تصف الحزن من الممكن أن تكون حقيقية.. أحسست بغصة في حلقي .. أحسست بها ولم تكن مجرد كلمة مجازية.. أردت بحق أن أبكي بحورا من الدموع .. أردت أن أبكي حتى ينتهي الدمع.. أردت ذلك بحق.. لأول مرة أحس بمعنى الموت.. معنى الفراق.. أحسست بأن داخلي فراغا ..ندمت أنني لم أقل له يوما كم أحبه ووجدت نفسي أعض أناملي ندما فعرفت معنى ان يعض الإنسان أنامل الندم.. كنت أظنها الأخرى كلمة مجازية وليست حقيقة .. كم كنت أكره القهوة وأشربها مضطرة اذا أردت ان أسهر وكنت أتعجب من الناس لماذا يحبون القهوة فهي شديدة المرارة.. وعندما مات أبي كانت المرارة في حلقي أشد من مرارة القهوة.. شربت القهوة فلم أجدها مرة .. أحس بمرارة حلقي ليلا نهارا.. أقوم لأغسل أسناني لعلها تزول ولكنها تأبى أن تزول.. كنت أظن أن تلك الكلمات التي تعبر عن الحزن كلمات مجازية .. ولكنها أصبحت حقيقية أكثر مما ينبغي.. حقيقية لدرجة مؤلمة

في عملي كنت أرى الكثير من الموتى.. وكنت أرى ذويهم وقد فتتهم الم الفراق.. كنت أتعجب.. لماذا هذا الحزن المبالغ فيه فالناس تموت.. نعم هي حقيقة الناس تموت.. ولكنني لم اكن أتخيل أن يأتيني الموت فيخطف مني أبي.. فالناس تموت ولكن ليس أبي.. والد صديقتي يموت ولكن سوف يظل الموت بعيدا عن أبي.. كان أبي مريضا بكثير من الأمراض المزمنة وكان مدخنا شرها .. تلك الأشياء تودي بحياة الناس في سن صغير..أنا أعلم ذلك لأني طبيبة.. ولكن ليس أبي.. فإن أبي لن يتركني سيظل معي.. لمن يتركني ؟؟ أبي لن يموت.. ولكن للأسف مات أبي .. جاء ملك الموت فأخذ روحه في هدوء.. لم يسأله عني ولم يهتم بمشاعري.. أخذه في صمت وذهب.. ذهب وتركني مبعثرة.. قطعا صغيرة مشتتة..

كثيرا ما اتخيله قادما الي مبتسم يريد أن يضمني اليه ولكن أفيق على الحقيقة فأنا لن أراه مره أخرى..

أعلم ان الحزن في بدايته شديد وسوف يقل مع مرور الوقت ويتضاءل ويتضاءل حتى نكاد ألا نشعر به في خضم حياتنا اليومية.. تلك هي طبائع الأمور.. لكنك يا أبي ستظل الى الأبد في قلبي .. ستظل ذلك الرجل الذي أحببته أكثر من أي رجل في الدنيا.. أقسم لك أنك ستكون دائما الرجل الأول في حياتي دائما.. فأنت كما قالت أمي عنك أنت العمر كله

مع السلامة يا أبي.. أحبك من كل قلبي

تحدي وصول عدد متعبي المذهب اللاويبوزي لألف

2009-02-16T21:03:00.005+02:00

مش فاهمة أنا ايه موضة التحديات دي ؟؟ تحدي وصول محبي الرسول لمليون .. تحدي وصول جروب المسلمين ل577 ألف .. تحدي ارسال الايميل ل57 ألف راجل أخضر بشنب .. تحدي وصول الايميل ده لمن صنعه بعد مروره على 70 ألف مسلم .. في الأغلب الأعم بلاقي الجروبات دي والايميلات دي ايميلات وجروبات اسلامية !! مش فاهمة ايه سر حشد القوات اللي بيعملوه ده و ايه الهدف منه والتحدي ده ضد مين يعني ؟؟ يا ترى واحد حلم ان الشيخ زعرور جالو في المنام واتحداه ولا هو صحي من النوم لقى انه فاشل في كل حياته فقرر انه يكون ناجح في شيء ما حتى لو كان بيد عمرو لا بيده؟؟؟ حقيقي ظاهرة متخلفة !! أنا أفهم كده لو مثلا في هدف للجروب زي مثلا لما جروبات بتقول انه عايزين نجمع أصوات علشان نحتج على شيء أو على جروب معين وان كنت مش متفهمة اللي هم بيعملوه بس أديني لقيت دافع أو سبب مقنع للتحدي وحشد القوات .. مش متفهمة ليه بقى ؟؟لأن منطقهم في منتهى السذاجة فمش بحشد القوات دي يعني هيقدروا يسكتوا كل واحد يطول لسانه أو يسب او يشتم أو يقول كلام مش لطيف .. ماتسيبوه يعوي من هنا لبكره الصبح والأولى بقى انك يا مسلم يا غيران على دينك ونبيك تعمل جروب مضاد وفيه كل الحقائق و تدافع عن نبيك بس مش من وجهة نظر متهم انما من وجهة نظر نشر الدين وتعريف الناس بالإسلام .. انا شايفه ان دا رد الفعل المنطقي انما حشد الحشود وتدشين القوات الانترنتية السلمية ناهيك عن انه مش هيقفل الجروب هو كمان مش هيمنع كل من يريد سب رمزك أو قدوتك أو حبيبك
ايه بقى اللي فكرني بالموضوع ده دلوقتي مع انه منتشر من قديم الأزل وخاصة خاصة الايميلات الدينية اللي بتنرفزني وتعصبني وأمانة عليك ليوم الدين ودي لها بوست تاني .. اللي فكرني النهاردة وخلاني أرجع هنا أكتب بوست بعد سنة تقريبا من الانقطاع اني لقيت الفرّة دخلت في اخواتنا المسيحيين بردو .. لا أخفي عليكم اني كان بداخلى اعجاب دفين باني على أد مشفت مواقع تبشير بس مكنتش شفت جروب على الفيس بوك بيدخل التحدي العقيم ده ولا بيحشد الحشود وبيلم القوات لحد النهاردة !!! النهاردة من خمس دقائق بالظبط كانت صدمتي .. لقيت جروب بيتحدى بردو وصول محبي السيد المسيح لمليون وكأن مش مكفينا ان حالة هطل التحديات ضربت في المسلمين فأبينا أن يخلو اخواننا المسيحيين من ذلك الهطل..
نفسي أفهم الهدف يعني أهه الجروب وصل مليون هيييييه في مليون واحد بيحب السيد المسيح أو سيدنا محمد منهم نص مليون ميعرفش عنهم حاجة بس انضم لأن الانفيتيشن جتله وهو استحرم يعملها اجنور .. أهه الهدف اتحقق .. كسبنا الرهان ولا التحدي .. هاستفيد ايه يعني؟؟ هاخد مصاصة ولا هتدوني جائزة المحب الأول
في حد هيقوللي طيب ماهو الفيس بوك أصلا شيء مالوش لازمة .. ايه الهدف منه أصلا .. بس هرجع وأقول ان للأسف الجروبات دي بتحزبنا.. بتأصل فينا معاني الفرقة كعرب .. مسلمين مسيحيين شيعيين سنة الجروبات دي بالذات وبعيد عن أي جروبات تانية دي بتقسمنا .. يعني الناس في الطبيعي بتعمل انفيت للسته كلها .. في الجروبات دي بالذات هنلاقي اللي بيعمل انفيت بيختار ده بيحب المسيح وده بيحب سيدنا محمد وده بيحب سيدنا علي ..شيء مقزز بصراحة اني أقسم في اصحابي كده حتى في وسط حياتي الاجتماعية من غير ماكون داخل كنيستي أو الجامع بتاعي ..

ودعوة مني لكم كلكم تدخلوا الجروب بتاعي جروب متبعي المذهب اللاويبوزي .. أدعوكم كلكم تلووا بوزكو وتدخلوا .. علشان نتحدى لازم نتحدى ولازم نكسب ..لا زم نكسب التحدي .. أشوفكو في حفل توزيع الجوائز ..

احساس

2008-03-28T19:16:00.002+02:00

عندي حاجات كتيره جديدة في حياتي .. بقيت طبيبة امتياز وانهيت سنين الدراسة والمذاكرة المقرفه .. بدرِّس اللغة العربية لطبيبة من تركيا -في مقابل مادّي- وعملت مقابلة علشان أشتغل بارت تايم في شركة دواء ونجحت الحمدلله -مع ان ناس كتير بتشوف ان المهنة دي لا تليق بالطبيب بس انا مهتمتش انا مؤمنة ان العمل مهما كان بيشرف صاحبه وان كان نجار أو سباك .. مفيش مهنه بتهين صاحبها انما تصرفات صاحب المهنة هي اللي بتهينه هو وليس مهنته ..جملة اعتراضية كبيرة انما لابد منها - هنرجع شقتنا قريب جدا ان شاء الله في خلال الاسبوع ده و النت هيرجع البيت تاني ان شاء الله وفرح أخويا يوم الأحد الموافق الثاني عشر من ابريل .. طبعا كل الحاجات دي أحداث سعيدة المفروض اني أكون سعيدة .. بس مش عارفه ليه مش حاسّه اني سعيده ... الحمد لله طبعا على كل شيء بس احساس السعاده عندي مش موجود مش عارفه ليه؟؟
-----------------------------------------
كان لازم أشد السطر ده لأن الكلام اللي فات دا كنت كاتباه من كام يوم.. كنت زهقانه مش عارفه ايه سبب الزهق ..بس دلوقتي الزهق راح بس دا ميمنعش اني لسه مش سعيدة .. أنا بدأت حاجات كتير كان نفسي تبتدي من زمان وحياتي دلوقتي جميلة على أفضل ما يكون؟ أنا ليه مش مبسوطه؟ ساعات بقول لنفسي ان أنا مش سعيدة علشان مفيش حالة حب بعيشها.. دايما كده الواحد بيتلكك لنفسه علشان يلاقي سبب يبرر بيه حزنه أو على الأقل عدم سعادته.. دلوقتي افتكرت شعر جميل كنت قريته .. أنا مش فاكراه بالظبط لأني قريته من زمان زائد ان أنا ذاكرتي جهنمية آخرها دقيقتين فاتو وما قبل ذلك بيروح في الوبا .. بس ربنا يخليلي جوجل المهم الشعر كان بيقول
ناقص حته
وكل ماوزن
ألاقي لسه
ناقصلي حته
وطبعا عرفت من صديقي جوجل ان صاحب الكلام العبقري ده هو علي سلامه فشكرا ليه على الكلام الجميل اللي قاله
مش عارفه هفضل اتلكك لنفسي بالحته اللي ناقصه دي لغاية امتى ؟ وهفضل أجري ورا الحته دي لامتى ؟ليه مبفرحش باللي معايا؟؟ يارب ماكونش زهقتكو مني.. أنا عن نفسي لو قريت كلامي هتغاظ من نفسي وهقول ليه يا بنتي كده ؟ انتي في نعمه ؟ ايه البطر ده ؟ بس والله مش بطر .. بس دا احساس

هو ده حقه؟

2008-02-19T21:35:00.002+02:00

لظروف معينه سبنا بيتنا ورحنا بيت جدي المتوفي نقعد أنا وأهلي شويه وعلشان كده ابتديت أنزل كافيهات الانترنت علشان عندي حاجات ضروريه بعملها على النت .. الموضوع سخيف أصلا لأن أنا متعوده ساعة ما أحب أدخل أونلاين أدخل إنما دلوقتي لازم ألبس وأنزل وأروح النت و حواليّه ناس وأنا واحده بتميل للخصوصيه يعني حتى وأنا بكتب البوست محبش إن حد يعدّي من ورايا مثلا ممكن يشوف كلمة أو ان حد يقعد بعدي ويلاقي مثلا المواقع اللي أنا دخلتها موجوده ..يعني مش بحب حد يعرف حاجه خاصة عني متلزمهوش

المهم من يومين وأنا خارجه وبحاسب على الساعات اللي قعدتها على الجهاز لقيت صاحب المكان وهو رجل كبير محترم دايما بقوله يا عمّو .. بيسألني عن اسمي .. عادي يعني قلتله اسمي شريهان ..قاللي ما أنا عارف .. استغربت ..وهو لاحظ كده وقاللي أصل انا فتحت الجهاز بتاعك من عندي وانت قاعده عليه لقيت جملة "......يا شريهان...."أنا اتخضيت .. أنا عارفه انه عنده على الجهاز الماستر ممكن يشوف الديسكتوب بتاعي بس الشاشات صغيره جدا معرفش انه ممكن يكبرها وحتى لو عارفه متخيلتش انه ممكن يعمل كده .. قاللي أصل أنا لما بحس ان حد بيعمل حاجه غلط أو بيفتح مواقع مش تمام بشوفه من عندي علشان مش عايز سمعة المحل تبوظ وانا بصيت بص واحده على جهازك لقيت الجمله دي وانها مفيهاش حاجه قفلت تاني على طول ..مش عارفة اتاخدت للحظه واديته يمكن عذر واديته سبب انه يشك في سلوكي لأني قعدت يومها لوقت متأخر أوي وأنه عامل مكان مخصص للفتيات ومعظم رواد النت من الفتيات.. بس بعدها فكرت حسيت أنه لأ.. أنا مقبلش حد يعمل كده معايا ..بس هو عنده بعض الحق بيحافظ على مكان أكل عيشه.. بس دا انتهاك للخصوصيه .. فرضا بقول سر لواحده صاحبتي وده وارد جدا أو بعمل أي حاجه مش عايزه حد يعرفها وجت عينه على الجملة دي .. بس بردو ما هو صاحب الكافيه ربنا هيحاسبه لو أنا فتحت موقع كده أو كده ..مش عارفه أنا بقيت في حيرة ..بس لو طبقنا منطقه دا يبقى شركات الاتصالات من حقها تتصنت على مكالماتنا وبردو بقى من حق الشرطه انها تتجسس علينا لو شكت اننا ممكن نعمل عمل غير قانوني يعني هتبقى مش حياة دي ...نرجع للنت تاني وصاحب النت اللي ربنا هيحاسبه على اللي الناس الي عنده بيعملوه.. أنا مبقتش عارفه.. بس اللي عارفاه اني مش هروح النت دا تاني ..

2008-02-09T13:39:00.000+02:00

مجدي مهنا ذلك الانسان الجميل .. في رحمة الله
الله يرحمه ويحسن اليه ويكتب له بكل حرف خطه جنات وأنهار

2008-02-05T20:19:00.000+02:00

http://justice4every1.blogspot.com/2008/02/blog-post_02.html
بداية لازم تقروا الموضوع ده بجد رائع جدا جدا
ثانيا: فيلم هي فوضى أنا دخلته وفعلا استمتعت بكل لحظه فيه نصيحة مني ادخلوه حلال فيه كل مليم
كلامي عن الفيلم ممكن يكون مدخل حلو للكلام اللي جاي لأن الفيلم بيتكلم عن فساد أحد أمناء الشرطة اللي هو خالد صالح .. بس انا حابة أتكلم عن الفساد في جهاز الشرطة بشكل عام .. الموضوع ده شاغل بالي من قبل ما أدخل الفيلم .. أنا مش شاغلني ليه الناس دي بتفسد ولا ايه اللي بيشجعهم على كده فده إجابته سهله جدا... الفلوس أو الحفاظ على المركز اللي لو سابوه هيخسروا مركزهم اللي حفوا طول عمرهم علشانه..صحيح الاجابات غير مقنعه بس أهي اجابه أو مبرر .. اللي شاغلني الناس اللي تحت الناس الفاسده ليه بيغطوا عليهم ؟؟ ليه بيساعدوهم على فسادهم ؟ أو بمعنى أصح ليه بيطيعوا أوامرهم ؟؟
فيه آيه جميلة جدا دايما بتلفت نظري
يقول تعالى: إِذْ تَبَرَّأَ الَّذِينَ اتُّبِعُوا مِنْ الَّذِينَ اتَّبَعُوا وَرَأَوْا الْعَذَابَ وَتَقَطَّعَتْ بِهِمْ الْأَسْبَابُ(166).البقرة
طيب الناس الصغيرة اللي بتطيع الناس الكبيره يا ترى فاهمين انهم بكده خسرانين دنيا وآخرة كمان .. طيب الفاسدين عارفين انهم خسروا الآخرة بس برضه فاهمين انهم كسبانين الدنيا .. بس الناس الصغيره دي .. أقصد العسكري الغلبان اللي في القسم.. عسكري الأمن المركزي اللي عمال يضرب المتظاهرين .. الشاويش الغلبان اللي تحت ايد الظابط .. الناس دي ساكته ليه ؟؟ ليه ساكتين على فساد الظباط اللي فوقهم .. وأقصد هنا فساد مالي أو اداري أو موافقه على فساد الروس الكبيره .. الظابط بيحافظ على مركزه .. بس الغلابه دول بيحافظوا على ايه ؟؟ لا مرتب ولا مركز ولا أي حاجه ..
مش عارفه هم ساكتين ليه ؟؟ ايه اللي خارسهم ومخليهم بيسكتوا عن جهاز عارفين انهم عماده وفي نفس الوقت عارفين انه بعبع الناس الغلابه اللي زيهم

حماده

2008-01-18T20:06:00.001+02:00

كان عندي صديق من كام سنه .. اسمه حماده ..هو كان صديق من الشات اتعرفت عليه هناك ولم تتطور علاقتنا عن كده .. ولكن بالرغم من إنه كان مجرد صديق شات .. لم نلتق أبدا.. إنما كان قريب جدا من قلبي ..عمر صداقتنا كان يمكن 3 سنين أو أكتر .. كنا بنتكلم كتير ..وماكانتش الحوارات دي عن تفاهات.. لطالما أعجبت بعقليته وغبطته عليها .. كان كلامه دايما كبير .. مش مجعلص مبيتفهمش إنما كلام كبير بالمعنى وسهل أوي في الوصول لقلبك .. كلام عن حاجات كبيره وهموم عامة .. كنت بحب كلامه و هدوؤه وتفكيره العميق في خطواته قبل أن ينفذها .. المهم دارت الأيام وعملت معاه موقف مش لذيذ .. وبعدها رجعنا نتكلم تاني وسامحني ورجعت عملت نفس الموقف تاني وسامحني وكررته تالت ولما رجعت أصالحه كان واخد موقف مني و ابتدا يكلمني بطريقه لم يكن هو حماده الذي عرفته من قبل ..هكذا أنا دائما أضيع ما أحب.. أنا عارفه انه له عذره بس أنا مقدرتش أستحمل إنه يكون جاف معايا كده.. مستحملتش إنه يكون غير الشخص اللي أنا عرفته وأعجبت بشخصيته .. المهم قررت إنهاء تلك العلاقه (الصداقة محدش يفهمني غلط ) وبطلت أكلمه .. حسيت بعد كده أد ايه القرار ده كان خاطيء لأن الشخص ده معرفته ما تتعوضش .. كان من الناس اللي يتقال عليها (معرفة بعض الناس كنوز)

المهم لا يفيد الآن البكاء على اللبن المسكوب .. وأنا مش بحكي دلوقتي علشان يقرالي ونرجع أصحاب لأنه لا يعرف أن لدي مدونة ..بتمنى من قلبي إنه يدخل ويقراها وإن كنت عارفه إنه إحتمال مستحيل .. حماده صديقي كان مره نصحني نصيحه .. كل يوم .. كل ساعة .. أو بالأدق كل دقيقه بفتكره بسببها.. قاللي اعني بالشيء .. لأول وهله أنا مفهمتش يعني ايه اعني بالشيء .. بعد شوية وبعد ما هو حاول يفهمني بدأت أفهم شوية.. كان قصده اني أهتم باللي أنا بعمله .. أفكر فيه ومكونش سرحانه في حاجه تانيه .. في الأول استغربت .. دا احنا معرفة شات .. ازاي يحكم عليّه اني مش بعني بالأشياء .. انا نفسي مكنتش مدركة اني كده.. لغاية ما لقيت ان أي حاجة غلط بعملها بسبب اني مش بعني بالأشياء.. متفهموش غلط أنا مش بقول أنا مش بتقن الأشياء هو ده ممكن يكون صح الى حد ما بس المشكلة الرئيسية اني مش بعني بالأشياء. يعني وانا بعمل أي حاجة بفكر في اللي بعدها أو في الخطوة الجايه .. دي مشكلة كبيرة .. بحاول أعالجها من يوم ما اكتشفت اني فعلا بعاني منها .. بحاول أركز في اللي أنا بعمله .. بس صعب جدا .. 24 سنه مش مركزه صعب إني أبتدي أركز .. دايما دماغي مشغوله دايما بفكر في شيء تاني .. ودايما كل ما يحصل حاجه أحس فيها بمشكلتي أقول الله يمسيك بالخير يا حماده ..

2008-01-15T20:24:00.000+02:00

أنا خلصت إمتحانات وبقيت حرة أخيرا الحمد لله إدعولي النتيجة بقى تعدي على خير

2007-11-21T14:09:00.000+02:00

أنا أهوى النور ..أهوى أن يكون المكان الذي أحيا فيه مضيئاً .. أرى ظلالاً فأضيء كل المصابيح وهكذا هي نفسي ..دائماً تهوى الأماكن الواضحة .. لا أحب ذلك اللون الرمادي حين نرى الأشياء كأنها خيالات بعيدة حينما لا نرى معالمها بوضوح ولا نرى حدودها ولا نهاياتها ..مجرد خيالات .. آه كم أكره تلك الخيالات.
أحياناً أشعر بالغباء ..لأني لا أفهم تلك الرماديات فأنا لا أراها ..لا أرى سوى لونين .. أبيض وأسود.. أحيانا يصبح العالم دنيا من الرماديات و يخلو من اللونين المحببين إليّ فتتوه نفسي ولا أجدني ..ضائعة تائهة حائرة .. كالطفل حينما يضيع من أمّه في الزحام

2007-08-12T17:45:00.000+02:00

بقالي فتره مش باجي يمكن بتاع ثلاثة شهور .. مكنش الهدف من الغياب اني ألغي المدونه ..الفكره دي جتلي قبل كده زمان بس رجعت في كلامي تاني لأني حسيت اني محتاجه أكتب .. الفتره اللي فاتت كانت أسوأ فتره مرت عليّه في حياتي .. ودلوقتي حالا أنا بتمنى اني كنت أبقى مداريه شخصيتي الحقيقيه علشان أتكلم بصراحه وأحكي .. بس للأسف فات الوقت ..

ساعات الواحد بيتمنى انه يشيل كام يوم من عمره .. أنا نفسي أشيل كام سنه من عمري .. كام سنه بحلوهم ومرهم ..بحزنهم وفرحهم .. وبأخطاءهم .. يمكن نفسي أرجع تاني لثانويه عامه وأبدأ من تاني ..يبقى عندي بتاع سبعتاشر سنه وأبتدي من تاني مشواري .. أفكر تاني في الكليه اللي أنا عايزاها .. أفكر كويس قوي وأختار صح .. يمكن تفتكروا ان الأزمه اللي بمر بيها دلوقتي بسبب اكتشافي اني اخترت الكليه غلط .. بس ده مش سبب .. دا من توابع الأزمه اللي أنا مريت بيها .. لقيت اني لازم أفكر .. هو ده اللي أنا عايزاه ؟؟ لما بتتخيلي المستقبل بتشوفي نفسك في الطريق اللي انتي بدأتيه دلوقتي ؟؟

كان هدفي لما دخلت الكليه دي اني أخفف آلام الناس .. ياترى فعلا هقدر ولا هكون ألم آخر يضاف الى آلامهم ؟؟ منكرش ان بردو هدفي اني أكون مشهوره وغنيه .. بس عامة دا هدف سواء كنت دكتوره أو حتى سكرتيره .. يعني أنا مكنتش عايزه أبقى دكتوره غنيه ومشهوره .. أنا عايزه أبقى غنيه ومشهوره بسبب أي مهنه أنا همتهنها ..أظن دا هدف مشروع ..هدف انساني طبيعي .. انما هدفي من كوني دكتوره هو تخفيف آلام الناس .. يا ترى هقدر أكون كده؟؟ علشان أكون كده الطريق لسه طويل وصعب .. يا ترى هقدر أمشي فيه ؟؟ كده كده أنا هدخل امتحانات السنه دي وان شاء الله هنجح وان شاء الله يكون بنفس تقدير كل سنه .. جيد جدا .. بس بعد كده .. أنا عايزه ايه؟؟ أنا مش عارفه أنا عايزه ايه ؟

عموما مش ده موضوعنا .. موضوعنا الأساسي اني غلطت في حق نفسي .. غلطت فيها جامد أوي .. مش عارفه أصالحها ازاي ؟؟ كان نفسي أتكلم بصراحه أكتر معاكو وأشكيلكو همي الكبير بس مش هعرف ..

هتحسوا من كلامي اني مشوشه ومش عارفه أرتب كلامي .. هو ده اللي حاصل فعلا .. أنا اتهزيت جامد أوي

مزمز ويارا

2007-05-20T19:57:00.000+02:00

في ظروف غامضه تم اختفاء مدونة الأخ العزيز مزمز وكمان المدونه الوليده بتاعة يارا ولمن يعلم أي شيء عنهم برجاء الاتصال بزيرو سبع زيروهات ... بجد وحشتوني وزعلانه منكم اوي أوي أوي ...مزمز ويارا مش طايقاكم بس وحشتوني أوي
مش عارفه أقولكو ايه بس لو سمحتو ارجعوا

أنا مش جميله

2007-05-08T13:16:00.000+02:00

بالرغم اني دايما بقول لنفسي ان الجمال الداخلي هو الأهم وبرغم اني عارفه اني من جوه انسانه كويسه عمري ما بحسد حد عمري ما بحقد على حد عمري ما بكيد لحد أو بعمل فعل شرير في حد وانا قاصده اني أأذيه وعمري حتي ما بقول كلمه بقصد اني أحرق دم حد حتى لو الحد ده أذاني .. انما عمر ما ده كان كافي بالنسبالي ..طول عمري نفسي أبقى جميله من بره .. شكلي وجسمي ..عمري ما اقتنعت اني جميله برغم ان ناس كتيره قالولي اني حلوه صحيح ماقالوليش اني فاتنه أو اني ملكة جمال بس كانوا بيقولولي اني حلوه .. بس عمري ما اقتنعت ..كنت بفرح لما حد يقوللي كده مش علشان أرضي غروري انما علشان أحس اني جميله لأني مقتنعه اني مش كده ..
أنا سمراء وبرغم كده عمري ما حاولت أغير لون بشرتي أو أفتحها برغم ان كتير من اصحابي بيفتحوا بشرتهم مع انهم أفتح مني بكتير بس أنا عمري ما اتضايقت من لوني .. أنا بعتز بيه جدا ويمكن المره الوحيده اللي فكرت فيها أفتح لوني مكنش علشان أنا متضايقه منه انما علشان البشره السمراء كل حاجه بتعلم فيها يعني لو تعويره نونو بتسيب أثر لو حبايه جت ومشيت في سلام بتسيب مكانها لون دي يمكن الحاجه الوحيده اللي بتضايقني في لوني الأسمر ...
مش عارفه ليه انا مش بحس اني جميله .. يمكن علشان الاعلام صدر لنا صوره معينه عن الجمال اللي هي بشره فاتحه شعر ناعم جسم رفيع أقربي الى أجساد الرجال منه اللي النساء .. ساعات كتير بقول لماما اني كان نفسي أكون في العصر القديم علشان أيامها التخن كان علامة جمال ..كان يمكن في تباين أكتر في مفهوم الناس عن الجمال .. انما دلوقت الجمال بقى واحد اتنين تلاته مش موجودين فيكي فياريت تكسري كل المرايات اللي بتقابليها في سكتك علشان ما تحبطيش نفسك ...
يمكن في محاولات كتير عملتها علشان أثبت لنفسي اني جميله ويمكن حاجات غلط عملتها بردو لنفس السبب ..بس كلها كانت بترتكز على اني أستمد احساسي دا من الخارج .. ان الناس هم اللي يشوفوني جميله وينقلولي الاحساس ده .. بس للأسف وبعد كل اللي عملته مازلت لا أشعر اني جميله .. علشان أنا من جواياي مش حاسه اني جميله وللأسف لو الواحد من جواه محسش انو جميل لو العالم كله اجتمع انو شايف فيه الجمال هو مش هيشوفه ...
أنا مش جميله :)

back

2007-04-25T13:53:00.000+02:00

ياه بقالي كتير قوي مقعدتش قدام شاشة الكمبيوتر ..آسفه بعتذرلكو عن الغياب الطويل ده بس حقيقي أنا كنت مشغوله الفتره اللي فاتت دي .. أول حاجه عايزه أقولها يمكن تكون بالنسبه لناس كتير حاجه تافهه بس بالنسبالي أنا حاجه كبيره قوي .. أنا ماعدتش تخينه صحيح لسه وزني زايد بس مش سمينه ودا حسب معامل كتلة الوزن .. أنا المعامل بتاعي نزل تحت التلاتين .. أخيرا أخيرا .. وان شاء الله هتخلص من الزياده الباقيه دي .. أعتذر لكلابيز من أجل التغيير فأنا لم أعد كلبوزه ولكني مازلت معاهم بقلبي .. أنا سعيده جدا
ولمن لا يعلم ما هو معامل كتلة الوزن
المعامل=الوزن بالكيلوجرام مقسوما على مربع الطول بالمتر
اذا كان من عشرين الى خمسه وعشرين فأنت وزنك مثالي
اذا كان من خمسه وعشرين الى تلاتين فأنت وزنك زائد
اذا كان من تلاتين الى اربعين فأنت سمين
اذا كان فوق الاربعين فأنت سمين بشكل مرضي
دي اول حاجه كنت عايزه أقولها
نشد خط بقى
ـــــــــــــــــــــــــــــــــــــــــــــــــــــــــــــــــــــــــــــــــــــــ
الفتره اللي فاتت جت مواضيع كتير على بالي وكنت عايزه أكلمكو فيها بس مكنش عندي وقت ودلوقتي للأسف أنا مش فاكره انا كنت عايزه اكلمكو في ايه بس في موضوعين شدوني من كام يوم وهما دول اللي هكلمكو فيهم
نشد خط تاني
ـــــــــــــــــــــــــــــــــــــــــــــــــــــــــــــــــــــــــــــــــــــــــ
أول موضوع هو قصه كنت قريتها في بريد الجمعه .. الجمعه قبل اللي فاتت اسم القصه تابوت امرأه.. باختصار القصه بتتكلم عن بنت اختارت انها تعمل كل اللي هي عايزاه في فترة الجامعه تحت مسمى الحريه الشخصيه .. المهم مشيت مع ولد وعملوا كل اللي نفسهم فيه في فترة الجامعه في منتصف الفتره دي جت بنت تانيه متدينه نصحت البنت صاحبة القصه وقالتلها ان تصرفاتها مش كويسه وهدومها وبرفانها ومشيها مع الولد وكل ده المفروض تبطله .. ردت عليها صاحبة القصة انها حره وان دي حريه شخصية وانتهى الموقف على مرأى ومسمع من الولد اللي هي ماشيه معاه .. جه بقى الولد ده في السنه النهائيه بعد عن صاحبة القصه وهي تساءلت في داخلها عن السبب وفجأه وهي خارجه من لجنة الامتحان لقت الولد ده ماشي مع البنت التانيه ماسكين ايد بعض .. المهم صاحبة القصه دي تقريبا شلء فراحت منفضه البنت التانيه وفكت ايديهم اللي ماسكينها في بعض دي .. قام الولد دا بقى قالها ايه .. اسمعو وعوا
ماتحوليش تتعرضيلها تاني علشان دي هتبقى مراتي على سنة الله ورسوله وأفتكر اني عمري ما وعدتك بالجواز أو حتى بالخطوبه ؟؟الحب حاجه جميله قناع بنلبسه علشان نمشي مع دي و دي و دي ونعيش حياتنا لكن ساعة مانقول يا جواز لازم نختار البنت اللي تصون شرفنا ست البيت اللي نستأمنها على أولادنا وعرضنا في غيابنا .. ايه اللي يضمنلي انك ما تحبيش واحد بعد الجواز وتخونيني وأفضل نايم على وداني زي ما أهلك كانوا نايمين على ودانهم وميعرفوش لحد دلوقتي ان بنتهم كانت بتخرج وتلف مع واحد ميربطهاش بيه أي شيء ..و بعدين انا أخدت منك كل اللي انا عايزه من غير جواز وعشت أيامي .. وانت كمان عشت أيامك وبصراحه خلاص زهقت منك كل حاجه كنت بطلبها منك كنت بتنفذيها لكن مش معنى كده اني ادبس فيكي أو أتجوزك وأقول القدر انت اللي زيك مالهاش امان أنا ماتجوزش واحده مشيت معاها وسيرتها جت على كل لسان .. أنا لو بعد الشر اتجوزتك أولادي هيشربوا منك الأخلاق المنحطه دي ولو بعد الشر حصل ده ربنا مش هيبارك لنا لأننا أغضبناه ..أنا الحمد لله دلوقتي ربنا رضي عني وبصلي الفرض بفرضه في الجامع .. اخترت الانسانه اللي هتصونني وتصون شرفي وهتربي اولادي على الدين والأخلاق ..صحيح انت اجمل منها بكتير لكن هي أعلى منك بأخلاقها وأدبها وتدينها
خلص الكلام ودمي اتحرق .. هعلق على كلامه كلمه كلمه .. أولا الحب مش قناع يا أمور الحب حقيقه أسمى من ان واحد وضيع زيك يفهمها وماهواش قناع ولا حاجه .. ادعاء الحب هو اللي قناع بيستخدموا الوضعاء أمثالك علشان يضحكوا على بنات الناس كل حاجه كنت بتطلبها كانت بتنفذها لأنها كانت بتحبك يا حمار واللي يضمنلك انها متخونكش انها بردو كانت بتحبك ..طبعا أنا مش بقول انها صح وان المفروض لما واحده تحب واحد تنفذله كل رغباته وان أغضبت ربنا .. أنا بس مش فاهمه المنطق اللي هو بيتكلم بيه وطالما انت مبتتجوزش واحده مشيت معاها كنت بتمشي معاها ليه في الأصل .. أنا مش فاهمه يعني وبعدين خايف على أولادك يشربوا الأخلاق المنحطه دي منها انا عايزاك تطمن خالص أولادك هيشربوا الأخلاق المنحطه منك انت .. وطالما انت شايف انها مش زوجه مناسبه ليك كنت بتمثل عليها الحب ليه ؟؟؟ وبعدين بتقول أنا ربنا رضي دلوقتي عني عرفت منين انو رضي عنك يا ناصح ..وبعدين انت لو صحيح مبتغي وجه ربنا ياللي عامللي فيها الشيخ الشعراوي كنت طلبت من صاحبة القصه انها تتوب وتبقى زيك وهي على حد كلامك مكانتش هتأخرلك طلب وتحاول ترشدها للطريق الصح وتستر عليها فضيحتها اللي انت السبب فيها .. وبعدين يا شاطر ياللي عارف دينك حد الزنا واحد في الست وفي الراجل ودا يعني لو هي أخلاقها منحطه فانت كمان أخلاقك منحطه مش علشان انت راجل وهي بنت فانت تمام ومعليكش عيب وهي المنحطه ..لو انت بتفكر كده يبقى انت متعرفش حاجه في دينك يا شاطر لأن الدين ساوى بين الاتنين هو زاني وهي زانيه.. بالعكس بقى كمان أنا شايفه انك منحط اكتر منها لأنك كنت بترسم عليها الحب علشان تنال غرضك انما هي لما كانت بتسلم ليك نفسها كان ده باسم الحب .. انا عارفه ان ده زنا وده زنا والعقوبه واحده بس على الأقل هي كانت في حالة ضعف وهو الحب .. المستفز بقى في الموضوع البت المتدينه .. ليه البنت دي رضيت تتجوز الولد ده مع انها عارفه أخلاقه .. وفرضا حتى انه تاب مش كان المفروض انها تنصحه انه يصلح غلطته مع البنت اللي قضى عليها دي بدل ما تروح تتجوزه .. يعني الواحد بيشوف حاجات غريبه والله .. جتهم الهم كلهم
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
نيجي بقى للموضوع التاني اللي استفزني بردو وهو مقال منشور في الدستور الاسبوعي العدد ما قبل الماضي .. ههه معلش كل أخباري بايته كده
المهم في العدد ده عدد تمنتاشر ابريل في صفحه تلاتاشر تحت عنوان (كح كح عن دخان الشيشه البناتي نتحدث .. مساء الخير ) وهو هنا ميقصدش الشيشه العنب هو يقصد البنات اللي بيشربوا الشيشه .. المهم كتبلنا الأستاذ محمد خلف الشمري من الكويت bofahad42@hotmail.com
بيقول ايه بقى الأستاذ محمد .. المقال كله انتقاد للبنات اللي بيشربوا شيشه .. كنت عايزه أسيب المقال من نصه لأنه مجبش جديد بس استمريت في قرايته وأنا أبحث عن كلمه واحده تنتقد سلوك شرب الشيشه عامة مش شرب البنات خاصة للشيشه .. المهم المقال خلص ومفيش ولا كلمه تذم في الشيشه نفسها وكأن الشيشه في حد ذاتها سلوك عادي أو مقبول ولكنه غير مقبول فقط حين يصدر من الجنس الناعم .. أنا هنا عايزه أشهدكو على حاجه .. عدد مين أكتر الرجاله اللي بيشربوا شيشه ولا البنات ؟؟ يعني لما يكون مثلا خمسين في الميه من الرجاله بيشربوا شيشه وعشره بس في الميه من البنات بيشربوا شيشه مين الأولى اننا نخصه بالنقد ؟؟ أنا مكنتش هزعل من المقال لو انه ذكر ان الشيشه دا سلوك غير حضاري وضار بالصحه لكلا الجنسين وبعدين بعد كده خص الستات بالكلام .. انما المقال من اوله لآخره عن الشيشه البناتي؟؟؟؟ طيب تيجي ازاي اذا كانوا هم أصلا أقليه في المستخدمين للشيشه ؟؟
اللي يعيش ياما يشوف والله ..
وعلشان محدش يقول اني بدافع عن البنات الي بيشربوا الشيشه .. أنا ضدهم وضد الشيشه بشكل عام وضد الرجاله اللي بيشربوا الشيشه وكل علاقتي بيها اني بحب ريحة الشيشه المعسل .. ويللا بقى كفايه كده أكيد زهقتوا خاصة انكو مش متعودين مني على البوستات الطويله دي
وفي النهايه أحب أقولكو انكو كنتو واحشني جدا وعايزه أشكر كل اللي علقوا على البوست اللي فات وكل اللي فتح صفحتي ودور على بوست جديد وخاصه ميرسي جدا جدا لمزمز على اهتمامه الدايم وأحب أشكر بابا و ماما وتيته وعمو صلاح وتانت مريم وابعت سلامي لأهل البحيره كلهم وأحب أهديلهم أغنية ست الحناين يا نانايا انتا

2007-04-04T16:52:00.000+02:00

عدنا مره أخرى
آسفه على محو ما هو قديم ويللا أديها فرصه نبتدي مع بعض صفحه جديده ..
انتظروني