أنا واللي حواليه

Tuesday, May 8, 2007

أنا مش جميله

بالرغم اني دايما بقول لنفسي ان الجمال الداخلي هو الأهم وبرغم اني عارفه اني من جوه انسانه كويسه عمري ما بحسد حد عمري ما بحقد على حد عمري ما بكيد لحد أو بعمل فعل شرير في حد وانا قاصده اني أأذيه وعمري حتي ما بقول كلمه بقصد اني أحرق دم حد حتى لو الحد ده أذاني .. انما عمر ما ده كان كافي بالنسبالي ..طول عمري نفسي أبقى جميله من بره .. شكلي وجسمي ..عمري ما اقتنعت اني جميله برغم ان ناس كتيره قالولي اني حلوه صحيح ماقالوليش اني فاتنه أو اني ملكة جمال بس كانوا بيقولولي اني حلوه .. بس عمري ما اقتنعت ..كنت بفرح لما حد يقوللي كده مش علشان أرضي غروري انما علشان أحس اني جميله لأني مقتنعه اني مش كده ..
أنا سمراء وبرغم كده عمري ما حاولت أغير لون بشرتي أو أفتحها برغم ان كتير من اصحابي بيفتحوا بشرتهم مع انهم أفتح مني بكتير بس أنا عمري ما اتضايقت من لوني .. أنا بعتز بيه جدا ويمكن المره الوحيده اللي فكرت فيها أفتح لوني مكنش علشان أنا متضايقه منه انما علشان البشره السمراء كل حاجه بتعلم فيها يعني لو تعويره نونو بتسيب أثر لو حبايه جت ومشيت في سلام بتسيب مكانها لون دي يمكن الحاجه الوحيده اللي بتضايقني في لوني الأسمر ...
مش عارفه ليه انا مش بحس اني جميله .. يمكن علشان الاعلام صدر لنا صوره معينه عن الجمال اللي هي بشره فاتحه شعر ناعم جسم رفيع أقربي الى أجساد الرجال منه اللي النساء .. ساعات كتير بقول لماما اني كان نفسي أكون في العصر القديم علشان أيامها التخن كان علامة جمال ..كان يمكن في تباين أكتر في مفهوم الناس عن الجمال .. انما دلوقت الجمال بقى واحد اتنين تلاته مش موجودين فيكي فياريت تكسري كل المرايات اللي بتقابليها في سكتك علشان ما تحبطيش نفسك ...
يمكن في محاولات كتير عملتها علشان أثبت لنفسي اني جميله ويمكن حاجات غلط عملتها بردو لنفس السبب ..بس كلها كانت بترتكز على اني أستمد احساسي دا من الخارج .. ان الناس هم اللي يشوفوني جميله وينقلولي الاحساس ده .. بس للأسف وبعد كل اللي عملته مازلت لا أشعر اني جميله .. علشان أنا من جواياي مش حاسه اني جميله وللأسف لو الواحد من جواه محسش انو جميل لو العالم كله اجتمع انو شايف فيه الجمال هو مش هيشوفه ...
أنا مش جميله :)

38 Comments:

  • بس انت معتزه بنفسك. اهنيكي.

    هما 24 جزء بيتوزعوا

    الحمد لله انا ماخدتهمش مال اوجمال


    :-)

    By Blogger MSameer, At May 8, 2007 at 3:56 PM  

  • عمر الجمال ما كان جمال اشكل
    الجمال جمال التربيه والادب والطبع والروح
    بوست جميل

    By Blogger مـحـمـد مـفـيـد, At May 8, 2007 at 8:33 PM  

  • من كلامك حسيت فعلا أنك جميلة حتي لو مكنتيش جميلة
    عارفة ليه
    علشان محولتيش تزيفي الواقع
    زي ناس كتير وحولتيش تضحكي علي نفسك وتعيشي الضحكة دي زي ناس كتير
    بس فعلا أنت جميلة

    By Blogger t3ban, At May 11, 2007 at 4:39 AM  

  • بس انتي بجد جميلة قوي
    معرفش ليه الإحساس ده جالي لما قريت البوست بتاعك
    صدقيني يا شيريهان اللي من القلب بيوصل للقلب

    كنت عاوزة اكتفي بالتعليق لحد هنا لكن فيه لي رأي أحب اقوله دايما باقوله لما الناس بتتكلم معايا عن الشكل و باقول لهم الشكل ما يهمنيش

    الشكل ده بيروح بالتعود سواءا حلو أو مش حلو بعد فترة كله بيتساوى
    و اللي بيحب حد بيشوفه أجمل حد في العالم
    ياما عيون ملونة و جميلة لكن مفيهاش روح و عيون تانية عادية أو أقل من العادي بكتير و مليانة حياة
    إنتي حد جميل قوي

    By Blogger إيمان الميهي, At May 12, 2007 at 2:32 AM  

  • msameer
    شكرا ليك يا مسامير .. وأنا معاك انهم 24 جزء بس عارف أي بنت بتتمنى انها يكون لها جزء واحد على الأقل في شكلها :)))





    محمد مفيد
    أنا مقتنعه بكده بس للأسف بطبق الكلام ده على الناس التانيه بس
    انما على نفسي فأنا دايما بدور على جمال الشكل
    شكرا على تعليقك



    t3ban
    ميرسي على زوقك .. بجد أخجلتم تواضعنا



    ايمان الميهي
    ميرسي يا ايمان بجد كلامك حلو أوي .. وميرسي كمان على البوست اللي كتبتيه تعلقي فيه على البوست بتاعي .. وصدقيني أنا كمان مش بهتم بشكل الناس اللي بتعامل معاهم وان كنت بهتم بنظافتهم وهندامهم .. بس أنا يهمني اني أحس اني انا جميله نفسي أحس الاحساس ده من جوايا ..
    ميرسي على كلامك الجميل يا ايمان و شكرا على اهتمامك

    By Blogger sherehan84, At May 12, 2007 at 12:14 PM  

  • لفت نظري جدا عنوان الموضوع

    مش ح اقول لك كلام نظري من عينة الجمال جمال الروح والعقل واللى بيتقال حوالينا ومجتمعنا غير مقتنع به

    يعني كتير صدعوا دماغنا بشعارات من عينة الجمال جمال الروح والعقل وهم انفسهم لهم مقاييس مختلفة للجمال

    لكن عجبني جدا انك صادقة مع نفسك ولا تحاولي تغيير طبيعتك

    وده في رأيي الجمال الحقيقي
    فكم من جميلة لو رشيتيها بشوية مية هووووووووو
    راح الجمال في ثانية

    مجتمعنا مزيف زويحب من يخدعه بالمساحيق والألوان

    اهم شيئ اتساقك مع نفسك واحساسك بقيمتك التي لن يعطيها لك احد
    تأكدي انه لايوجد على الارض من يشعرك بما لاتشعري انت شخصيا به
    فإذا لم تكوني شاعرة بجمالك الداخلي وراضية عن نفسك فلن يسعدك اطنان مديح من هذا وذاك
    الجمال الحقيقي هو شعورك انت بجمالك

    فلاتوجد إمرأة قبيحة ولكن توجد من لاتشعر بجمالها

    كل أنثى جميلة وبها من مواطن الجمال ماليس في غيرها

    فكم من جميلة المنظر ولطن لاتتمتع بجاذبية ولا سحر عندما تتحد\ث او لها صوت أجش او ليس لها حضور

    المهم في الموضوع هو شعورك انت تجاه نفسك
    ولا تنتظري المديح او الاعتراف بجمالك من غيرك

    فنحن في زمن الاحساس بالجمال فيه صار صناعيا وبلاستيكيا

    وبرضه انا شايفة انك جميلة جدا جدا

    وصراحتك جزء من جمالك

    By Blogger Bella, At May 12, 2007 at 3:37 PM  

  • اهلا بزميلة الكفاح الكلابيزي
    تشرفنا يا فندم
    كلنا في الكلبزا سوا

    تحياتشي

    By Blogger Sampateek, At May 12, 2007 at 8:36 PM  

  • سيبك من ان الجمال جمال الروح و الكلام ده :] ، أنا عاوز أسأل على حاجة تانية ، مين قاللك ان السمار عيب؟؟ لو بتقولي على نفسك مش جميلة عشان السمار يبقى اسمحيلي انتي غلطانة!!

    يمكن محبي البياض أكتر ، بس فيه ناس بتحب السمار برضه.

    مش بجبر بخاطرك على فكرة ، أنا عارف أنا بقول ايه
    lol

    By Anonymous someone, At May 12, 2007 at 11:32 PM  

  • كثيرا ما نقرأ و نرحل
    و كثيرا ما نقرأ و نكره الكاتب أنه أضاع وقتنا في كلمات لا معني لها
    قليلا جدا ما نقرأ شيء و نشعر بعدها أننا أفضل حالا
    هذا ما حدث في تدوينتك هذة
    قرأت في مرة أن الكاتب أن كان يحب الناس تحبه الناس و تحب أن تقرأ له و العكس صحيح
    علي فكرة في نوع من الجمال أهم من جمال الشكل اللي بيكون مؤثر جدا في بداية العلاقة مع الناس بالذات لو كانت البنت جميلة
    لكن مع الوقت الناس بتتعود علي جمال الشكل
    لكن في بئر مياه لا ينضب مثل جمال الشكل ... انا ما شوفتكيش و لا أعرفك و يمكن تكوني جميلة الشكل
    لكن الاهم من ده أنك جميلة الروح
    ما بين سطورك هو اللي بيقول كده

    By Blogger karakib, At May 13, 2007 at 9:34 AM  

  • طبعا انا مش هاقولك ..الجال جمال الروح و الشكل مش مهم ... و الكلام الفارغ ده

    لان ده كان كلام بلاستيك و ساح فى الحر خلاص

    ههههههههههه

    اجدع حاجه فيكى انك شجاعه و جريئه و ماهربتيش من الواقع و و اجهتيه

    انتى فعلا ممكن تكونى مش جميله .. بمقاييس الجمال الحاليه

    بس المهم انك تعرفى اهمية الجمال ايه بالنسبه للى قدامك ..

    يعنى عشان تفهمى

    انا مثلا زيى زى اى شاب ...كانت بتلفت نظرى طبعا البنت الجميله

    بس السؤال :

    كانت بتلفت نظرى عشان ايه ؟؟؟؟؟؟؟؟؟؟

    اقولك

    عشان اتكلم عليها و على مفاتنها

    عشان احاول انى اصاحبها

    علشان اقول لاصحابى انى اعرف فلانه المزه

    ههههههه

    بس

    انما لما كبرت و السطحيه راحت

    ابتدت اهمية الجمال تقل و تحل محلها حاجات كتير قوى

    زى الثقافه ...الاخلاق .... خفة الدم ...... و ...و

    و لما فكرت انى اتجوز ...

    صحيح الحمد لله اتجوزت واحده جميله ..بس مش هو ده السبب الوحيد


    السبب هو انها كان فيها خليط من الصفات كلها اللى تتناسب معايا

    و اخرهم بجد كان الجمال

    دلوقتى بقى انتى حددى ...عايزه الجمال و الا قليل من الجمال و كثير من الاشياء الاخرى ...

    نصيحه : دايما فكرى ايه اللى عندك و اللى مش عندك خليه للأخر

    تحياتى ..و ابقى فضى نفسك نص ساعه و تعالى زورينى ..زهاتلاقى حاجات حلوه
    ههههه

    سلام

    By Blogger Shower-Mirror, At May 13, 2007 at 10:23 AM  

  • إنتي متأكده إن إنتي اللي كاتبه البوست ده؟ أنا مش حاسس إنه ممكن يكون كلامك يا دكتورة .. يا إما فيه حاجة ضايقتك في الفترة اللي فاتت خليتك تكتبي البوست ده

    By Blogger يا مراكبي, At May 13, 2007 at 2:19 PM  

  • مصدقك و الله بس اهو الواحد ماينفعش يدور على حلول لحاجات من نوع هو انت خلقتنى كده ليه يا رب!

    اهو الواحد راضى بقضاه

    :-)

    By Blogger M.Sameer, At May 13, 2007 at 11:22 PM  

  • bella
    ميرسي يا جميل على كلماتك الرقيقه
    فعلا اهم شيء أن تشعري انت بجمالك لا أن يشعر به الآخرون ,.. تلك هي المشكله :))))







    sampateek
    أنا اللي تشرفت يا جميل أهلا بيكي هنا






    someone
    أنا مش بقول ان السمار عيب أو وحش عندك مثلا هالي بيري سمراء بس تجنن و بيونسيه بردو سمراء بس قمر .. السمار مش وحش بس الاعلام رسملنا صورة ان الحلوه هي البيضا أم شعر ناعم وعيون خضرا وجسم رشيق وأنا مش كده خااااالص علشان كده مش حاسه اني جميله .. وزي ما قلت في البوست انا عمري ما اتضايقت من لوني بالعكس أنا معتزه بيه جدا وعمري ما حاولت أغيره أو أستخدم كريمات التفتيح اللي بقت أكتر من الهم عل قلب
    شكرا على كلماتك اللطيفه



    karakib
    مش عارفه أقولك ايه .. بجد كلامك لطيف جدا ..ومكنتش متوقعه ان ممكن تدوينه بسيطه وهابله كده تبث فيك المشاعر دي كلها
    lميرسي على زوقك وكلماتك الرائعه وصدقني فعلا كلماتك خلتني أشعر بأني أفضل حالا بالضبط كما أشعرتك كلماتي أنك افضل حالا
    ميرسي جدا





    shower-mirror
    هههههههههههههه
    عارف ساعات كتير بسأل نفسي لو اتعرض عليكي انك تاخدي الجمال ويتاخد منك مثلا حبة ذكاء (هم حبه اللي عندي أصلا مش ناقصه) أو مثلا يتاخد منك حاجه بتحبيها بصراحه دايما بختار الواقع اللي أنا فيه .. الجمال الخارجي مش شيء أساسي في الحياه وممكن الاستغناء عنه بس بردو الواحد بيحتاج يحس انه جميل خاصة لو انت بنت..
    ميرسي على كلامك فيه الكثير من العزاء لأنك حسستني ان الرجاله لما بيشوفوا البنت الجميله تفكيرهم بيروح في اتجاه واحد وانا محبش لما حد يشوفني يفكر فيه كمزه بس ..
    ميرسي على تعليقك ووقتك



    م/ أحمد ثروت
    هههههه.. لأ دي أنا ومش نابع من مود معين كنت فيه .. دا تفكيري بشكل دائم :))
    اتصدمت فيه مش كده هههههه

    م. سمير
    أولا أنا آسفه لأني كتبت اسمك مسامير وهو م.سمير :))
    ربنا يرضينب دايما بما قسمه لنا ..
    وشكرا على اهتمامك بردي ومرورك على الموضوع مره أخرى

    By Blogger sherehan84, At May 14, 2007 at 8:21 PM  

  • يا ستى قبلك كتير غلطوم. عادى. انا بس حسيت ان ردى كان غير مهذب شويه. بس اصله كان فى لحظة ضيق. اعتذارى و تحياتى

    By Blogger M.Sameer, At May 15, 2007 at 12:13 AM  

  • مش اوي كده يا شيريهان
    صراحتك جميلة
    وبعدين لازم تعرفي حاجة
    ممكن تبقي شايفة نفسك مش جميلة وتقابلي في يوم واحد يشوف فيكي تقاطيع تجنن انتي نفسك ومع كمية الساعات اللي وقفتي فيها قدام المرايا عمرك ما شوفتيها
    فاكرة الواد اللي كتبت عنه اللي مصاحب واحدة مش بيخليها تسلم علي بنات
    الواد تعرفي زي ما بيقولوا جان وهي لا
    انا عن نفسي شايفها وحشة بس هو بيموت فيها
    اما بالنسبة للجسم ديه ماقدرش اقولك فيها حاجة
    حاولي تخسي

    By Blogger 3rby, At May 15, 2007 at 4:53 PM  

  • شرين

    إنتى مش جميلة ... إنتى شرين


    دمتفكريش كتير

    ساعت ما ييجى الحب

    هتكونى أجمل ملكة جمال توجت على وجه الأرض للحبيب


    وصدقينى

    مبقتش تفرق


    أوقات كتير اوى من كتر الهم إللى حولينا والزهق المسيطر على الناس

    بنكسل نغسل وشنا أو نكوى هدومنا
    أو حتى نلبس هدوم نظيفة

    مبتفرقش أحنا جمال ولا لاء

    أهم حاجة الأحساس بالراحة

    حاولى تدورى على الراحة



    وعادى بقة
    أودى

    By Blogger ody911, At May 15, 2007 at 11:33 PM  

  • آآآه ياني..
    بجد آآآه ياني..
    انا كنت اعرف جوه نفسي ان اكيد في حد بيعاني زيي..
    بس عمري ماشوفت حد من اللي بيعانوا دول..وعمري ماعرفت اقرا احساسهم..
    الموضوع ده مؤلم اشد الالم..
    خصوصا..
    لما يكون الناس مابترحمش..وخصوصا اكتر لما الواحد بيغلط غلطه بشعه زي اللي فينا دي..
    وهي اننا نخلي عنين الناس هي مرايتنا..
    ياربي...بجد بجد...دي ابشع حاجه ممكن الانسان يرتكبها في حق نفسه..
    انا اكتشفت ان عندي سوء في تقديري لذاتي..
    وفي الغالب كل اللي بيشتكوا من حاجات زي كده بيبقى عندهم ضعف في تقديرهم لذاتهم..
    انا بقول تقريبا..مش اكيد..

    انا حاولت اقرا اجزاء من الردود...
    الردود اغلبها منطقي جدا..
    بس المنطقيه دي آلمتني..آه والله آلمتني..
    الناس مهما قالت مهما عملت..
    هاتلاقي تصرفاتهم حاجه تاني..
    يعني كان في ناس اعرفهم زمالينا ايام الجامعه وكده..
    روحت عند صاحبتي النهارده..فاجئتني ان معظمهم خطبوا خلاص..
    ففرحت اوي..بتوريني صورهم في خطوبتهم...لاقيت كل البنات اللي خطبوهم..مواصفات واحده لكن الشكل اكيد مختلف(البياض..العيون الواسعه..الوش الصغير بخدود مسمسمه..رفيعين..براءه..و..و)
    استغربت اوي لما لاحظت كده..
    مش عشان حاجه الا ان الناس دي كانت دايما تقول ان ده مش مقياس..ولما جم يتجوزوا...اختيارهم كان بالمقياس اللي هم رافضينه يكون مقياس..حد فهم حاجه؟
    على فكره انا اتأثرت جدا بكل اللي اتقال لأن البوست ده..صوره كتابيه للي جوايا..
    انا اسفه على الاطاله

    By Blogger warDaya, At May 19, 2007 at 6:14 AM  

  • معلش يا اخت وردايه بس معنى كلامك ده ان اروح انتحر علشان مش هاجوز ؟

    يالله اهو كل حى بياخد نصيبه وعلى كل حال اللى خلقنا مابينساناش ولو بعد حين

    تحياتى

    By Blogger M.Sameer, At May 21, 2007 at 1:45 AM  

  • m.sameer
    أنا محستش ان ردك كان مش مهذب ولا حاجه حتى رجعت قريته تاني لقيته عادي ..متاخدش الأمور بحساسيه كده ..وبعدين سيبك كلنا لنا لحظات ضيق وأنا عن نفسي لما ببقى متضايقه تاخد مني كلام عجب فميهمكس يعني ..وعلى فكره انت منور هنا


    3rby
    المشكله يا عربي مش ان حبيبي شايفني مش جميله ومش ممكن تتحل بمجرد انه يشوفني جميله المشكله ان انا مش شايفه انا جميله ودي مشكله مش لاقيالها حل:)))
    أما بقى بالنسبه للخسسان والله بحاول اهيء اهيء


    ody911
    بردو يا أودي المشكله مش ان حبيبي مش شايفني حلوه المشكله ان انا مش شايفه نفسي حلوه .. أو يمكن انت صغتها بشكل أجمل اني مش مرتاحه مع نفسي .. مش عارفه أجيبها منين الراحه دي ياخويا .. حاجه وحشه




    wardaya
    محدش حاسس بيكي أدي ولا حد هيحس بيا أدك .. فعلا مشكله وكتير من الناس مش هقول كلهم عندهم ازدواجيه في النقطه دي .. أنا حتى يمكن عندي الازدواجيه دي مع نفسي يعني مع اني مؤمنه ان الشكل مش مهم بس عايزه أحس اني جميله وبرغم اني بقول ان اللي جوه هو الأهم فأنا بدور على اللي بره .. والغريب بقى اني مع الناس مش بهتم بالشكل بهتم باللي جوه بس .. حاجه غريبه مش كده ..
    المفروض نحل الموضوع ده يا وردايه مش معقول نفضل بالوضع ده على طول



    m.sameer
    نصف التعليقات يتاعتك مش معقول كده هههههه
    لا بجد منور المدونه

    By Blogger sherehan84, At May 21, 2007 at 1:59 PM  

  • بالعكس انتى جميله اوى من جوه و من بره
    انا كمان زيك كده بس العكس .. يعنى روفيعه جدااااا و شكلى مش حلو و كنت دايما اقول الناس مستحمله تبص لى ازاى كنت بخاف ابتسم لان ابتسامتى مش حلوه ... ياه كانت ايام صعبه اوى و كتير كنت بعيط و كتير كنت بسمعهم يقولو داليا حلوه بس ابتسامتها مش حلوه ... كان كلامهم بيقتلنى بالرغم انه كان من ناس قريبه اوى .. دلوقتى انا بقي عندى ثقه فى نفسي و فى شكلى .. اكيد ربنا عاطينى اجمل شكل اكون عليه ..اهم حاجه تكون عندك ثقه فى نفسك

    By Blogger Dalia, At June 10, 2007 at 3:54 PM  

  • بصى يا بنتى ,,, أنا كمان سمرا شوية .. و عندى حاجة كانت مخلية واحدة كانت اسمها صاحبتى ليل و نهار تتريق على بيها .. تقريبا جابتلى عقدة و خصوصا انى كنت صغيرة فى السن و اعدت افكر انى لما اكبر هاعمل عملية تجميل ... بس لما كبرت عملت عملية التجميل دى جوة نفسى .. اتصالحت مع نفسى و مع الشكل اللى ربنا خلقنى بيه .. ما همنيش بقى مين يقول على إيه لانى مش انا اللى عملت كده فى نفسى ... و كمان ماحدش كامل ... حتى لو عيبه مش باين عليه من برة .. ممكن يكون مغطيه بالهدوم و بيموت من جواه .. و هم يعنى اللى بيطلعوا على التليفزيون بيكونوا كده بجد ؟ دول بلاستيك .. مش حقد بس لانها حقيقة ... و الى تطلع تقول انا ما عملتش عمليات تجميل .. بيكون قصدها انها ما عملتش كتير ... ساعات بتبقى فيه عيوب هى السبب فى انك تتشدى للبنى آدم اللى قدامك .. و أشهر مثل هى أسنان نجلاء فتحى ... هتقولى ده عيبها الوحيد هوافقك على كده ... بس لو نجلاء فتحى ماكنتش حلوة من جوة عمرك ما كنتى هتطيقى تشوفيها و لا هتتقبيلها حتى لو من غير سنانها المعووجة ... خليكى حلوة من جوة و نفضى لى يقولك أى كلام ... المهم ان ربنا يوديكى للى يشوفك حلوة بعيوبك دى .. لانها معاه هتتقلب و تبقى مميزات

    By Blogger بيقولوا سايكو, At June 17, 2007 at 9:45 AM  

  • حسيت انك بتتكلمي عن احساسي
    انا كمان زيك بالظبط

    بس احنا برضه حلوين عشان بنحب كل الناس اللي حوالينا

    By Anonymous منال, At June 20, 2007 at 8:21 AM  

  • المشكلة إنك بتعترفى إن إنتى اللى مش شايفه نفسك جميلة
    مش بقى إن الناس مخنوقة من شكلك ومعقداكى
    لأ, ده كمان بتقولى إن ناس كتيره بتقول عليكى حلوه.. بس إنتى مش شايفه نفسك

    حلوه
    يبقى إيه الحل ؟
    عقلك بيقولك يابنت إنتى غلطانه فى أفكارك دى, جمال الشكل مش كل حاجه ..

    وبعدين إنتى مش وحشه يعنى
    بس إنتى مش مقتنعه بكلام العقل ده
    لييييييييييه؟
    هوّه ده السؤال ياست شيريهان
    إنتى مش راضية بشكلك ليه ؟
    مش شايفه نفسك جميلة ليه؟
    وبتدورى على الجمال ليه؟

    علشان عريس كويس ؟ وللا علشان نظرات الإعجاب ؟عقدة نقص وكلام من ده؟ وللا

    علشان تغطى على حاجه تانيه إنتى متضايقه منها فعلا وبتبعدى تفكيرك عنها بمشكلة

    الشكل والجمال دى؟

    أكيد إنتى عارفه الكلام العادى بدليل إنك قلتيه بنفسك ووافقتى عليه معظم اللى علّقوا

    هنا من قبيل إن كل فوله ولها كيال وإن الجواز نصيب والجمال مش دايما بيبقى المحرك

    الأساسى .. ناهيك عن إنى أنا شخصيا شفت جوازات كانت العروسه فيها -وآسف

    للتعبير- قبيحة فعلا مش مسألة إنها مش جميلة قوى أو حتى روحها حلوه أو .. أو ..
    لأ كانت العروسه قبيحة وساذجة !! طيبه أيوه مش شريرة بس مافيهاش مميزات جبارة

    يعنى تغطى على الشكل
    ورغم كده كان العريس وسيم وحالته المادية معقولة وماعندوش عيوب خطيرة
    والعكس تماما
    عريس متواضع الحال والشكل وعروسته قمر فعلا وتنفع نجمة سينما
    فى الجواز مابيبقاش الشكل أبدا هو المحرك الأساسى وإنما النصيب زى مابيقولوا

    عموما أنا مش شايف مشكلة حقيقية فى إنك مش جميلة لأن أول ماييجى البنى آدم

    اللى هيحبك هتشوفى نفسك جميله غصب عنك بدليل إن البتاع ده بيحبك :)

    هاعيد عليكى السؤال تانى

    إنتى مش راضية بشكلك ليه ؟
    مش شايفه نفسك جميلة ليه؟
    وبتدورى على الجمال ليه؟

    علشان عريس كويس ؟ وللا علشان نظرات الإعجاب ؟ وللا علشان تغطى على حاجه

    تانيه إنتى متضايقه منها فعلا وبتبعدى تفكيرك عنها بمشكلة الشكل والجمال دى؟

    و زى كل اللى سبقونى .. سعيد بجرأتك وصراحتك مع نفسك

    By Blogger Leonardo, At June 22, 2007 at 3:01 PM  

  • This comment has been removed by the author.

    By Blogger Leonardo, At June 22, 2007 at 3:03 PM  

  • عايزة اقولك حاجة غريبة جداا نفسيي ...انا شابة في العشرينات اعاني من ندوب كثرة واضحة في وجهي نتيجة حادث....و رغم هذافانا اري ألأعجاب في وجوةمعظم من حولي من الرجال بل احيانا اعجباهوم يلفت نظر المحيطيون ويؤدي ال تعلقيهوم ....بل و الأكثر ان الكثير ممن حولي من النساء يغار مني ....غريبة فوجهي فعلا يكاد يكون مشوهة ....و علي فكرة انا اعرف اميز جدا بين الأعجاب و الشفقةو لكن دائما يتتكرر من كثير ممكن حولي نفس التعبير (فيكي شيء جذاب لا اعرف ما هو)و عندما افكرر بيني و بيننفسي ما هوالشيء الجاذب الذ يجذب لي الناس بهذا الطريقة لا اجد شء سوي شخصيتي التي ربما عوضني بيها اللة سبحانة و تعالي لكي تجبر ما نقص في شكلي و تتتساوي المعدلة الصعبة ...فالللة عدل و كلنا تساوينا في القسمة و لكن اختلف التوزيع .....و ألأنسان الناضج يرضي بما قسم اللة لة و كل ما في يدية ان يحاول الحفاظ علي ميزاتة و يطورها ان امكن ...و يتكيف مع ما رأة عيوبا او بألأحري ان امكن العمل عليها و تحسينها كان بيها و أن لم يكن فليرضي بقضاء الللة

    By Anonymous Anonymous, At July 1, 2007 at 6:27 AM  

  • هى البنات لسعت ولا ايه ؟

    By Blogger Shark, At August 1, 2007 at 12:01 AM  

  • مع تمنياتنا لك بالتوفيق والكلمه الصادقه
    د.مرادآغا
    طبيب من أصل سوري
    حزب السلام اسبانيا
    partidodelapaz@hotmail.com

    By Blogger partido de la paz, At August 11, 2007 at 9:21 PM  

  • This comment has been removed by the author.

    By Blogger Ririjackson, At October 12, 2007 at 3:31 AM  

  • والله انتى جيتى على الجرح
    انا كمان مش جميلة لدرجة ان الانتحار لو مكنش حرام كان زمانى مسترحة من زمااااااااااااااااان..لكن للاسف الانتحار حرام
    من وانا صغيرة بسمع تعليقات تعقد وكلام مستفز خصوصا ان ماما ما شاء الله عليها جميلة جدا فطبعا كتير من اقاربنا ومعارفنا بيقولوا لى انتى ليه طلعتى كده ليه مش طلعتى حلوة زى ماما زى ما اكون انا اللى متسببة فى خلقتى دى..وهو لو كان الواحد مسئول عن شكله كان بقى فيه حد وحش فى الدنيا !!
    مش عارفة اقول ايه بجد بس الموضوع ده عقدنى لدرجة كبيييييييييييييرة جدا انا حتى من كتر كرهى لنفسى ومن كتر الغل اللى جوايا كنت بمسك الموس واعد اجرح فى نفسى لحد ما اشوف دمى بينزل وبعدين اهدى او اعد اشك نفسى بدبوس او اخد حتة ازازة صغيرة واجرح نفسى بيها كل الجنان ده كان بيهدينى..بس هو الحمد لله انا بطلت اعمل كده دلوقتى..
    بس انا الموضوع ده لسه تاعبنى اوى وتقريبا لازم كل يوم اعيط شوية ومش عارفة اعمل ايه..
    واللى تاعبنى اكتر خايفة لحسن ربنا ميسامحنيش على اللى عملته فى نفسى..
    ياريت تدعولى ربنا يهدينى او ياخدنى وارتاح

    By Anonymous Anonymous, At October 12, 2007 at 3:37 AM  

  • السلام عليكم ورحمة الله وبركاته. والله يا جماعه اهم حاجة الرضا لأنه ده نصيب كل واحد وسواء الانسان رضى أم لم يرضى فلن يغير ذلك من الامر شئ، غير أنه اذا رضى سيكون عند الله محمودا وساعتها ربنا قادر والله قادر والله قادر أن يجعله فى عيون جميع الناس بما فيهم نفسه اجمل مخلوق ، ولكن اذا لم يرضى سيكون عند الله مذموما _والعياذ بالله_ ووقتها سيجعل حاله اسوأ وأسوأ ويغضب عليه الله وفى النهاية أيضا لن يعطيه الله الا ما قسمه له دون أن يشعر حتى بسعادة تلك النعم التى لا يرضى عنها. وقال الله ولئن شكرتم لأزيدنكم ولئن كفرتم إن عذابى لشديد والعياذ بالله من جحود النعم. فمن قال الحمد لله حقت له بها نعمه. فياربى لك الحمد كما ينبغى لجلال وجهك وعظيم سلطانك.ويمكن يكون ده اختبار يجزيك الله به الجنة اذا صبرتى . فبالله عليكى هل هذا كثير على نعيم ابدى وجمال تغار منك الحور العين فى الجنة إن شاء الله.يمكن ربنا له فى كده حكمة اذا كنتى جميلة زى ما انتى عايزه يمكن كنتى تتكبرى وتتغرى. وعلى فكرة كل بنت لها جمالها الخاص بها وإن شاء الله ربنا يجعلك فى عيون زوجك أجمل النساء. ادعى القريب المجيب ولا تيأسى من رحمة الله.فهو الملاذ الوحيد. فكرى كده

    By Blogger basma, At October 30, 2007 at 1:14 PM  

  • السلام عليكم ورحمة الله وبركاته. والله يا جماعه اهم حاجة الرضا لأنه ده نصيب كل واحد وسواء الانسان رضى أم لم يرضى فلن يغير ذلك من الامر شئ، غير أنه اذا رضى سيكون عند الله محمودا وساعتها ربنا قادر والله قادر والله قادر أن يجعله فى عيون جميع الناس بما فيهم نفسه اجمل مخلوق ، ولكن اذا لم يرضى سيكون عند الله مذموما _والعياذ بالله_ ووقتها سيجعل حاله اسوأ وأسوأ ويغضب عليه الله وفى النهاية أيضا لن يعطيه الله الا ما قسمه له دون أن يشعر حتى بسعادة تلك النعم التى لا يرضى عنها. وقال الله ولئن شكرتم لأزيدنكم ولئن كفرتم إن عذابى لشديد والعياذ بالله من جحود النعم. فمن قال الحمد لله حقت له بها نعمه. فياربى لك الحمد كما ينبغى لجلال وجهك وعظيم سلطانك.ويمكن يكون ده اختبار يجزيك الله به الجنة اذا صبرتى . فبالله عليكى هل هذا كثير على نعيم ابدى وجمال تغار منك الحور العين فى الجنة إن شاء الله.يمكن ربنا له فى كده حكمة اذا كنتى جميلة زى ما انتى عايزه يمكن كنتى تتكبرى وتتغرى. وعلى فكرة كل بنت لها جمالها الخاص بها وإن شاء الله ربنا يجعلك فى عيون زوجك أجمل النساء. ادعى القريب المجيب ولا تيأسى من رحمة الله.فهو الملاذ الوحيد. فكرى كده

    By Blogger basma, At October 30, 2007 at 1:15 PM  

  • بعد السلام عليكم
    انتى بتقولى الكلام اللى انتى بتقوليه ده وبتقولى ان فى ناس بتقول عليكى جميله

    قوليلى رايك انتى بقى فى واحده مش شايفه نفسها جميله واللى حواليها بيكرهوها فى نفسها وبيحسسوها انها ناقصه مش بنى ادمه زى كل البشر وده لانها سمينه اوى لدرجه انها بقى عندها حاله لا مبالاه من ناحيه زياده الوزن دى بقت بتاكل لمجرد الاكل مش علشان جعانه

    By Blogger Eman Abdel-Aziz, At November 30, 2007 at 3:03 AM  

  • بعد السلام عليكم
    انتى بتقولى ان فى ناس بتقول عليكى جميله

    ايه رايك بقى فى واحده مش شايفه نفسها جميله وكل اللى حواليها بيكرهوها فى نفسها وبيفقدوها ثقتها فى نفسها شويه بشويه وبيعاملوها على انها بنى ادمه ناقصه لانها سمينه وهى وصلت لحاله لامبالاه من ناحيه زياده الوزن غير عاديه لدرجه انها بقت تاكل لمجرد الاكل مش علشان جعانه

    By Blogger Eman Abdel-Aziz, At November 30, 2007 at 3:06 AM  

  • 情趣用品,情趣,情色,成人,A片,自拍,情趣用品,情趣,色情,成人影片,色情影片,免費A片,情趣用品,情趣,成人網站,A片下載,日本AV,做愛,情趣用品,情趣,美女交友,A片,辣妹視訊,情色視訊,情趣用品,情趣,色情聊天室,聊天室,AV,成人電影,A片,情趣用品,情趣用品,情趣,情趣

    情色,A片,AIO,AV,日本AV,色情A片,AV女優,A漫,免費A片,A片下載,情色A片,哈啦聊天室,UT聊天室,聊天室,豆豆聊天室,色情聊天室,尋夢園聊天室,080視訊聊天室,080聊天室,080苗栗人聊天室,免費視訊聊天,上班族聊天室,080中部人聊天室,視訊聊天室,視訊聊天,成人聊天室,一夜情聊天室,辣妹視訊,情色視訊,成人,成人影片,成人光碟,成人影城,自拍

    情趣用品,A片,AIO,AV,AV女優,A漫,免費A片,日本AV,寄情築園小遊戲,情色貼圖,色情小說,情色文學,色情,色情遊戲,一葉情貼圖片區,色情網站,色情影片,微風成人, 嘟嘟成人網,成人,成人貼圖,18成人,成人影城,成人圖片,成人影片,UT聊天室,聊天室,豆豆聊天室,尋夢園聊天室,080聊天室,080苗栗人聊天室,080視訊聊天室,視訊聊天室

    情趣用品,A片,aio,av,av女優,a漫,免費a片,aio交友愛情館,a片免費看,a片下載,本土自拍,自拍,愛情公寓,情色,情色貼圖,色情小說,情色文學,色情,寄情築園小遊戲,色情遊戲,嘟嘟情人色網,一葉情貼圖片區,色情影片,情色網,色情網站,微風成人,嘟嘟成人網,成人,18成人,成人影城,成人圖片,成人貼圖,成人圖片區,成人小說,成人電影

    情趣用品,情趣用品,情趣,情趣,情趣用品,情趣用品,情趣,情趣,情趣用品,情趣用品,情趣,情趣,情趣用品,情趣用品,情趣用品,情趣用品,情趣用品.情趣,情趣,情趣,情趣,視訊聊天室

    麻將,台灣彩卷,六合彩開獎號碼,運動彩卷,六合彩,遊戲,線上遊戲,cs online,搓麻將,矽谷麻將,明星三缺一, 橘子町,麻將大悶鍋,台客麻將,公博,game,,中華職棒,麗的線上小遊戲,國士無雙麻將,麻將館,賭博遊戲,威力彩,威力彩開獎號碼,龍龍運動網,史萊姆,史萊姆好玩遊戲,史萊姆第一個家,史萊姆好玩遊戲區,樂透彩開獎號碼,遊戲天堂,天堂,好玩遊戲,遊戲基地,無料遊戲王,好玩遊戲區,麻將遊戲,好玩遊戲區,小遊戲,電玩快打

    麻將,台灣彩卷,六合彩開獎號碼,運動彩卷,六合彩,線上遊戲,矽谷麻將,明星3缺一,橘子町,麻將大悶鍋,台客麻將,公博,game,,中華職棒,麗的線上小遊戲,國士無雙麻將,麻將館,賭博遊戲,威力彩,威力彩開獎號碼,龍龍運動網,史萊姆,史萊姆好玩遊戲,史萊姆第一個家,史萊姆好玩遊戲區,樂透彩開獎號碼,遊戲天堂,好玩遊戲,遊戲基地,無料遊戲王,好玩遊戲區,麻將遊戲,好玩遊戲區,小遊戲,遊戲區,電玩快打,cs online

    情趣用品,情趣,A片,AIO,AV,AV女優,A漫,免費A片,情色,情色貼圖,色情小說,情色文學,色情,寄情竹園小遊戲,色情遊戲,AIO交友愛情館,色情影片,情趣內衣,情趣睡衣,性感睡衣,情趣商品,微風成人,嘟嘟成人網,成人,18成人,成人影城,成人圖片,成人貼圖,成人圖片區,UT聊天室,聊天室,豆豆聊天室 ,哈啦聊天室,尋夢園聊天室,聊天室尋夢園,080苗栗人聊天室,080聊天室,視訊交友網,視訊

    By Anonymous Anonymous, At March 26, 2009 at 1:08 PM  

  • http://www.eg-girl.com
    دردشة شات بنت مصر , دردشة مصرية , شات بنات مصر , شات مصرى , شات بنات , بنت مصر , بنات مصر

    By Blogger ahmed, At December 28, 2009 at 6:59 AM  

  • http://www.eg-girl.com
    دردشة شات بنت مصر , دردشة مصرية , شات بنات مصر , شات مصرى , شات بنات , بنت مصر , بنات مصر

    By Blogger ahmed, At December 28, 2009 at 6:59 AM  

  • أنا عندي مدونة عن الجمال ولسه كاتبه بوست عن تفتيح البشره ولكن الحقيقه انا ماكنتش عايزه اكتبه و وأنا بكتبه كنت بفكر بكل البنات اللي بتتمنى بشرتها تفتح ليه؟ بالرغم من ان الغرب بيتمنى السمار ده وكل الأغاني عن السمر
    في دوال الغرب ديماً الأفارقه الأمريكيين بيحاربوا اللي بيحالوا يفتحوا بشرتهم وان اللي بيعمل كده يبقى حاسس بالعار من مجتمعه الخ الخ شئ مقزز ازاي الرجل العربي والمرأه العربيه او المصريه مش عايز ومش عايزه لونها الأسمر للأسف

    By Blogger Diana Shalabi, At November 28, 2012 at 12:44 AM  

  • وأنتي جميله :))

    By Blogger Diana Shalabi, At November 28, 2012 at 12:45 AM  

Post a Comment

Subscribe to Post Comments [Atom]



<< Home